معاهدة فردريك - الكامل هى اتفاقية سلام وقعها فردريك التانى ( Frederick II ) امبراطور الامبراطوريه الرومانيه المقدسه و الصقليتين و الملك الكامل محمد بن العادل سلطان مصر فى 18 فبراير 1229.
خلصت الحمله الصليبيه الخامسه على مصر و المعروفه بإسم حملة جان دى برين بالفشل و اتعملت هدنه بين مصر و الصليبيين لمدة تمن سنين. لكن فى الغضون دى وصلت دمياط سفن عليها عسكر ألمان. السفن دى كان بعتها فردريك التانى كمدد لمساعدة جيوش الحمله الخامسه لكن وصلت متأخره بعد ما المفاوضات كانت خلصت و اتوقعت اتفاقية الهدنه فإحترمت القوات الالمانيه الاتفاقيه و ما دخلتش فى معارك و خلصت الحرب و انسحب الصليبيين من مصر بالكامل فى سبتمبر 1221.
فى سنة 1228 طلع فريدريك التانى على راس الحمله الصليبيه الساته ، ودى كانت حمله صغيرة قوامها 600 فارس بس ، راح بيهم على عكا ، فبعت له هناك الملك الكامل رسوله " فخر الدين يوسف بن الشيخ " عشان يتفاوض معه